Како да ја градите психолошката отпорност кај адолесцентите, од позиција на родител?

Психолошката отпорност би можела да се дефинира како способност да се продолжи пред предизвиците и неуспесите со кои се соочуваме. Се смета дека оваа човекова снага е исто така важна, колку што се талентот и интелигенцијата. Истражувањата покажале дека девојките почесто чувствуваат потреба да бидат совршени и дека нивната самодоверба често е засегната дури и кога ќе направат мали грешки. Во ваквите ситуации тие знаат да бидат престроги кон себе, па на моменти дури и целосно обесхрабрени да продолжат понатаму што доведува до пасивизирање и препуштање на ситуацијата.

Веројатно секој родител би сакал да му помогне на своето девојче да изгради поголема самодоверба, издржливост и решителност.

Постојат повеќе начини кои би можеле да помогнат во постигнување на сето ова.

Потикнете ја и негувајте ја идејата за личен раст. Ова најдобро би го постигнале преку пофалување на трудот кој го вложуваат при справување со некој предизвик, наместо со пофалување за постигнатиот резултат. Често кај децата и младите постои убедување дека способностите сѐ нешто со што се раѓаме , и нема можност да се подобрат, што доведува до тоа да се откажат кога ќе наидат на потешкотија при решавање на одредена задача. Затоа, пофалете го процесот наместо резултатот!

Учете ги девојчињата реално да ги проценат своите способности. Често, преголемите очекувања и тенденцијата кон перфекционизам доведуваат до жестока самокритика, страв од грешка и огромно чувство на вина. Како родители, помогнете им да ги осознаат своите слаби и силни страни. Тоа ќе им помогне да во иднина со свесност си ги потенцираат силните страни, а и да ги прифатат сопствените слабости и својата несовршеност и автентичност.

Оставете ги да се соочат со предизвици. Веројатно една од најтешките задачи на секој родител е токму ова, да го оставите вашето девојче да се соочи само со обидите и грешките кои ги прави и да ја гледате фрустрацијата која ја чувствува. Обидете се да ја видите поголемата слика. Помагајќи им постојано и тргајќи ги сите пречки од патот, вие несакајќи им праќате порака дека тие не се во можност сами да го решат предизвикот, и дека немаат доволно снаги и вештини за тоа. Оставајќи им простор и давајќи им време да го решат проблемот, тие ја градат самодовербата и свесноста за своите снаги.

Препознајте кога сте потребни и вклучете се. Можеби звучи збунувачки да препознаете кога е време да се вклучите? Поставете прашање. Ако вашето девојче се сложи да и помогнете, тогаш не тргајте со инстант решенија. Само насочете ја и покажете и ги опциите кои ги има. Крајната одлука сепак нека биде нејзина. На овој начин вашето девојче ќе има чувство на контрола над ситуацијата.

Бидете модел за вашето дете. Она што како родители ги подучувате вашите деца треба и да го практикувате и покажувате во секојдневното функционирање. Затоа внимавајте како вие се однесувате пред вашите деца, кога се соочувате со предизвик. Внимавајте на своите реакции и својот речник. Убаво би било во таквите ситуации да зборувате гласно за планот и чекорите со кои ќе ја надминете ситуацијата. Вклучете ги и нив да дадат предлог за надминување на одредена ситуација. Внимавајте ситуацијата да не биде премногу сериозна секако, и обидете се да користите хумор. Хуморот ја зголемува издржливоста и го намалува стресот.

Потикнувајте ги да се грижат за себе.

Грижата за себе е одговорност за себе пред се, а не себичност. Ова е нешто што девојчињата би требало да го научат уште од најмала возраст. Подучувајте ги колку е важно да се има доволно сон, одмор, физичка активност како и време за контакт со себе. Убаво би било кога би ги научиле на одредени техники за опуштање како што се техники на дишење, мускулна релаксација, слушање на пријатна музика или медитација. На овој начин им давате алатки за во иднина кога ќе се чувствуваат вознемирено да можат тоа да го препознаат и да си помогнат на себе.

Отпорноста е нешто што се гради со тек на времето соочувајќи се со предизвиците, вежбајќи да се надминат што поскоро и поефикасно и превземајќи нови во иднина.

Родителите би требало да ги охрабруваат своите девојчиња со љубопитство, да им пристапат на предизвиците и да пробаат да најдат уживање низ процесот на нивно надминување. На овој начин девојките ќе имаат верба дека можат да се справат со секоја пречка по патот и да излезат посилни решавајќи ја.

М-р Александра Стојановска

Психолог, Семеен-системски советник

*Реализацијата на овој проект е овозможена од ДМ Маркт Македонија