Зимата може да влијае на Вас повеќе отколку што сте свесни, а со неа е поврзана многу реална психичка состојба која се нарекува Сезонско афективно растројство. Кога времето станува сиво и мрачно, вашето расположение може да почне да се менува според она што се случува надвор. Недостатокот на сончеви, топли денови може да влијае на вашиот мозок повеќе отколку што мислите, а тука се и раното стемнување и промената на часовникот како фактор.
За повеќето состојби на ментално здравје, времето за симптоми може да биде релативно непредвидливо. Но, за некои луѓе, сезонската депресија или сезонското афективно растројство (САР) започнува како часовник. Впрочем и во нашето поднебје веднаш со менувањето на часовникот. Сезонската депресија е еден вид на депресија, и не влијае на Вас цела година. Најверојатно ќе ја почувствувате во зима поради промените на дневната светлина што може да влијае на вашите хормони и биолошки циркадијален ритам.
Некои луѓе може да доживеат симптоми и во различен дел од годината, како што е летото. Но, обично се јавува од октомври до февруари и може да вклучи некој од овие симптоми:
- Пад на расположението и чести осцилации
- Чувство на болка во поголемиот дел од денот, речиси секој ден
- Губење на интерес за работи кои порано ги сметавте за пријатни (анхедонија)
- Чувство на слаба енергија или претерана замореност, како и поспаност и летаргичност
- Тешкотии со фокусирање или концентрирање
- Прокрастинација на обврските
- Чувство на безнадежност или безвредност
- Промени во биолошкиот ритам – обично во насока на премногу спиење
- Промени во обрасците на исхрана – обично во насока на зголемена и појака исхрана
Тоа што може да помогне да се изборите со сезонската депресија и да го зачувате вашето ментално здравје во текот на зимската сезона, е да се создаде нова зимска рутина и да се држите до неа.
Кога се чувствувате оптоварени со сезонска депресија, можеби ќе сакате само да останете во кревет и да не излегувате од дома. Но, преземете обврски, колку и да се мали, и придржувајте се до рутината. Создавањето на тие позитивни навики во вашиот секојдневен живот, може да ги направи потешките денови да изгледаат подопадливи.
Излезете надвор кога можете. Да, ова може да биде тешко кога зимското време не е најдобро, но да најдете неколку моменти за да вдишете свеж воздух и да впиете природна светлина и малку сонце може да биде клучно за враќање на невротрансмитерите на вашиот мозок во баланс. Ако вашиот работен распоред Ве натера да заминете и да се вратите дома од работа во темница, обидете се да вложите свесен напор да поминете дел од паузата за ручек надвор кога можете.
Викендите се супер време за престој во природа, како и хобија и зимски спортови надвор на воздух.
Да не заборавиме дека вежбањето е докажан начин за подобро ментално здравје. Видот на вежбање може да изгледа различно во зависност од тоа како се чувствувате секој ден, но дури и некои едноставни истегнувања може да го зголемат вашето расположение и енергија и да го задржат вашиот имунолошки систем под контрола. Првиот чекор е секогаш најтежок, но сè што ќе Ви „ја придвижи крвта’’ ќе помогне да се ослободите од симптомите на сезонската депресија.
Внесете повеќе светлина. Вашето расположение ќе е променливо во текот на зимските месеци бидејќи не сте толку изложени на светлина. Кога не можете да им се спротивставите на елементите и природата, користете светилка што го симулира истиот тип на сончеви зраци што би ги добиле во лето. Ова е познато како „светлосна терапија“ и за некои луѓе, во суштина може да го поттикне вашиот биолошки часовник. Истражувањата покажуваат дека 60 – 80% од луѓето кои имаат симптоми на сезонска депресија имаат корист од употребата на светилка за терапија со светлина, само по два до четири дена.
Јадете здрава и свежа сезонска храна, а правете хидратација со свежи сокови и чај!
Внесете дополнителна витаминска суплементација и додатоци во исхраната, во консултација со фармацевт и лекар, ако тоа Ви е потребно.
Не се изолирајте во целост, задржете ја социјализацијата! Макар и по дома, макар и во помала група!
Читањето книги и гледањето филмови се супер зимска занимација, која луѓето најчесто ја практицираат!
Разговарајте со вашиот терапевт. Понекогаш,оваа симптоматологија е прифатена како зимска норма, но не мора да биде така. Доколку забележувате дека симптоматологијата се зголемува или дека веќе немате ресурси за справување, консултирајте се со стручно лице! Може да договорите еден проактивен план кој ќе ви помогне да се чувствувате одлично оваа зима, и секоја зима што доаѓа.
